«Ньюкасл» бош мураббийи Эдди Хау Чемпионлар лигаси 1/8 финали доирасида «Барселона»га қарши кечган дастлабки ўйиндаги (1:1) жамоаси ҳаракатларини юқори баҳолади.

«Қарғалар» 86-дақиқада Харви Барнснинг саъй-ҳаракатлари билан ҳисобда олдинга чиқиб олишган эди. Бироқ 96-дақиқада Ламин Ямал пенальтини аниқ амалга ошириб, меҳмонлар учун дурангни таъминлади.

«Менимча, биз ажойиб ва жуда кучли ўйин кўрсатдик. Охиригача темпни пасайтирмадик. Албатта, ўйин якунидаги вазият умумий таассуротни бир оз бузди, лекин умуман олганда, бу бизнинг энг яхши иштирокларимиздан бири бўлди.

Биз бу голни ҳеч қанақасига ўтказиб юбормаслигимиз керак эди. Вазиятни таҳлил қилиш лозим, аммо ўтказиб юборилган тўп бизнинг 93 дақиқа давомида жуда яхши ўйнаганимиз ҳақидаги ҳақиқатни ўзгартирмайди. «Камп Ноу»да қийин бўлади, лекин биз ўзимизга ишонамиз», — деди Хау TNT Sports нашрига берган интервьюсида.

Жавоб учрашуви 18 март куни бўлиб ўтади.