«Барселона» президенти Жоан Лапорта Хави Эрнандесни истеъфога чиқариш ва унинг ўрнига Ханс-Дитер Фликни тайинлаш ҳақидаги қарор ўзини тўлиқ оқлади, деб ҳисоблайди.
Испаниялик мутахассис 2024 йилнинг май ойида «кўк-анорранглилар» бошқарувидан четлатилган эди. Унинг ўрнига келган Флик дастлабки мавсумидаёқ мамлакат ички аренасидаги барча учта совринни қўлга киритди, шунингдек, жамоани Чемпионлар лигаси ярим финалига олиб чиқди.
«Хайриятки, Хавини қўйиб юбориш ҳақидаги қарор тўғри бўлиб чиқди ва клуб манфаатларига тўлиқ мос келди. Флик деярли ўша таркиб билан ишлаб, бизни яна ғалабалар йўлига қайтарди, Хави даврида эса жамоа кетма-кет муваффақиятсизликларни бошдан кечираётган эди», — дея Лапортанинг сўзларини келтиради BarcaTimes.
Ханс-Дитер Фликнинг «Барселона» билан амалдаги шартномаси 2027 йилнинг ёзига қадар мўлжалланган.
