«Астон Вилла» дарвозабони Эмилиано Мартинес фаолиятини Италияда давом эттириши мумкин.

Tuttosport нашрининг хабар беришича, Туриннинг «Ювентус» клуби аргентиналик посбон билан шартнома имзолашга қизиқиш билдирмоқда. Турин клубига ўтиш учун голкипер маошининг камайишига рози бўлишига тўғри келади. Ҳозирда дарвозабоннинг агентлари «Ювентус» билан уч йиллик шартнома борасида музокаралар олиб бормоқда.

Эмилиано Мартинес 2020 йилда «Арсенал»дан 17 миллион евро эвазига «Астон Вилла»га ўтган эди. Унинг «шерлар» билан амалдаги шартномаси 2029 йилнинг 30 июнига қадар мўлжалланган. Жорий мавсумда 33 ёшли голкипер инглиз клуби сафида барча турнирларда 30 та ўйинда майдонга тушиб, 34 та гол ўтказиб юборди ва 8 та учрашувда ўз дарвозаси дахлсизлигини сақлаб қолди. Transfermarkt портали Мартинеснинг трансфер қийматини 15 миллион еврога баҳоламоқда.