UEFA ва CONMEBOL қарорига кўра, Испания ва Аргентина миллий жамоалари ўртасида ўтказилиши керак бўлган Финалиссима учрашуви бекор қилинди.

УЕФА расмий баёнотида айтилишича, ташкилот ўйинни сақлаб қолиш учун турли вариантларни кўриб чиққан, бироқ уларнинг барчаси якунда Аргентина футбол ассоциацияси томонидан қабул қилинмаган.

Биринчи вариантга кўра, учрашувни Мадриддаги "Сантьяго Бернабеу" стадионида аввалдан белгиланган санада ўтказиш, трибуналарда мухлисларни 50/50 нисбатда жойлаштириш таклиф қилинган. Аммо Аргентина бу таклифни рад этди.

Иккинчи вариант сифатида Финалиссима ўйинини икки босқичда ўтказиш таклиф қилинган:

— биринчи баҳс 27 март куни «Сантьяго Бернабеу»да;
— иккинчи ўйин эса Буэнос-Айресда, UEFA Euro 2028 ва Copa América мусобақалари олдидан юзага келадиган халқаро танаффус пайтида.

Бу вариантда ҳам мухлислар 50/50 нисбатда жойлаштирилиши режалаштирилган эди. Бироқ бу таклиф ҳам рад этилди.

Шундан сўнг УЕФА Европа ҳудудида нейтрал майдон топилса, учрашувни режадагидай 27 март куни ёки муқобил сана — 30 мартда ўтказиш учун Аргентинадан кафолат талаб қилди. Бу таклиф ҳам қабул қилинмади.

Аргентина эса ўйинни жаҳон чемпионатидан кейин ўтказишни таклиф қилди. Бироқ Испания терма жамоасининг тақвимида бўш сана бўлмагани учун бу вариант ҳам бекор қилинди.

Якунда, аввал келишилган режага кўра ўйин 27 мартда ўтказилиши керак бўлганига қарамасдан, Аргентина фақат 31 март куни ўйнашга тайёр эканини маълум қилди. Бу сана эса ФИФА тақвимида мавжуд эмас эди.

Шу тариқа, УЕФА расмий сайтида эълон қилинган баёнотга кўра, ушбу Финалиссима ўйини бекор қилинди.