«Ардус» футзал клуби бош мураббийи Баҳодир Аҳмедовнинг сўзларига кўра, амалдаги Европа чемпиони – «Қайрат»га қарши иккинчи ўртоқлик учрашуви биринчисига нисбатан мураккаброқ бўлади.

Эслатиб ўтамиз, 18 август куни Тошкентдаги «Ўзбекистон» спорт мажмуасида «Ардус» ҳамда Қозоғистоннинг «Қайрат» клуби ўртасида белгиланган икки ўртоқлик учрашувидан дастлабкиси бўлиб ўтди. Қизиқарли кечган баҳс «Ардус»нинг 3:2 ҳисобидаги ғалабаси билан якунига етди.

Бугун, 19 август, душанба куни жамоалар ўртасидаги иккинчи ўйин бўлиб ўтади. Ўйин 17:30да бошланади.

«Тахминимча, «Қайрат»га қарши иккинчи ўйин биринчисига нисбатан оғирроқ бўлади, - деди Баҳодир Аҳмедов. – Шунга қарамай, биз, худди рақибимиз сингари, ғалаба учун бор кучимизни ишга соламиз. Спортнинг маъноси ҳам аслида шу».

«Кечаги ўйин менда яхши таассурот қолдирди. Ўйиннинг ўзи жуда томошабоп чиқди. Ҳар иккала жамоа ҳам ўзини ижобий тарафдан кўрсата олди, бироқ шу кун омад биз томонда бўлди. Шогирдларимнинг ҳаракатларидан ҳам тўла қониқиш ҳосил қилдим», - дея қўшимча қилди Аҳмедов.

Август охирида «Ардус» қитъа клублари ўртасидаги энг нуфузли мусобақа – Осиё чемпионати баҳсларида курашни бошлайди. Баҳодир Аҳмедовнинг қайд этишича, унинг жамоаси ушбу мусобақага тайёр.

«Биз Осиё чемпионатига жуда яхши тайёргарлик кўрдик. «Қайрат»га қарши учрашувлар эса ўйинимизда сўнгги камчиликларни аниқлаб олиш имконини беради. Умуман олганда, жамоамиз Японияда бўлажак баҳсларга тайёр», - деди «Ардус» бош мураббийи Баҳодир Аҳмедов.