«Манчестер Юнайтед» сардори Бруну Фернандеш Премьер-лиганинг битта мавсумида амалга оширилган голли узатмалар сони бўйича клуб рекордчисига айланди.

Португалиялик ярим ҳимоячи «Астон Вилла»га қарши учрашувда (3:1) жамоадошларига икки бор голли пас узатди. Эндиликда 31 ёшли футболчининг ҳисобида чемпионатдаги 16 та самарали узатма мавжуд — у 2000 йилда Дэвид Бекхэм (15 та) томонидан ўрнатилган клуб рекордини янгилади.

«Жамоадошларимга ёрдам бериб, бу натижага эришганимдан хурсандман. Бошқаларга қувонч улашиш ҳам жуда ёқимли. Ушбу рекорд мен учун улкан ютуқ, аммо бу мавсумда чемпионатни муваффақиятли якунласак, бундан ҳам кўпроқ бахтиёр бўламан», — деди Фернандеш Sky Sportsга берган интервьюсида.

«МЮ» 30 та турдан сўнг турнир жадвалида учинчи ўринни эгаллаб турибди.