«Manchester Yunayted» sardori Brunu Fernandesh Premyer-liganing bitta mavsumida amalga oshirilgan golli uzatmalar soni bo‘yicha klub rekordchisiga aylandi.

Portugaliyalik yarim himoyachi «Aston Villa»ga qarshi uchrashuvda (3:1) jamoadoshlariga ikki bor golli pas uzatdi. Endilikda 31 yoshli futbolchining hisobida chempionatdagi 16 ta samarali uzatma mavjud — u 2000 yilda Devid Bekxem (15 ta) tomonidan o‘rnatilgan klub rekordini yangiladi.

«Jamoadoshlarimga yordam berib, bu natijaga erishganimdan xursandman. Boshqalarga quvonch ulashish ham juda yoqimli. Ushbu rekord men uchun ulkan yutuq, ammo bu mavsumda chempionatni muvaffaqiyatli yakunlasak, bundan ham ko‘proq baxtiyor bo‘laman», — dedi Fernandesh Sky Sportsga bergan intervyusida.

«MYU» 30 ta turdan so‘ng turnir jadvalida uchinchi o‘rinni egallab turibdi.