Испания чемпионатининг 28-турида «Барселона» ўз майдонида «Севилья»ни 5:2 ҳисобида мағлуб этди. Бу Испания чемпионати доирасида «Барселона»нинг ўз уйида «Севилья»га ютқазмай келаётган кетма-кет 23-ўйини бўлди.

Меҳмонлар охирги марта 2002 йилнинг 15 декабрида «Барселона» майдонида ғалаба қозонишган — ўшанда «кўк-анорранглилар» ўз дарвозаларидан жавобсиз учта тўп олиб чиқишган эди. Бу воқеа клубдаги чуқур инқироз даврига тўғри келган ва ушбу муваффақиятсизлик якунда Луи ван Гал билан хайрлашишга сабаб бўлган эди.

Шундай бўлса-да, бу серия, ҳар қанча ҳайратланарли туюлмасин, ушбу клублар ўртасидаги ўзаро муносабатлар тарихидаги рекорд натижа эмас. 1940 йилдан 1986 йилгача «Барселона» ўз уйида «Севилья»га қарши кетма-кет 43 та ўйинда мағлубият нималигини билмаган.