Ироқ терма жамоаси Жаҳон чемпионати йўлланмаси учун ҳал қилувчи ўйин ўтказиш мақсадида Мексиканинг Монтеррей шаҳрига хусусий самолётда йўл олади. Бу ҳақда Al-Kora Exhibition  нашрига таяниб Риа Новости хабар берди.

Маълум қилинишича, жамоа 20 март, жума куни Саудия Арабистонининг Арар шаҳридаги аэропортдан махсус рейс билан Мексикага учиб кетади.

Эслатиб ўтамиз, Яқин Шарқдаги қуролли можаролар туфайли минтақада ҳаво ҳудудларининг ёпилиши Ироқ жамоаси учун катта муаммоларни келтириб чиқарди. Жамоанинг ярми Бағдодда қолиб кетган, бош мураббий Грем Арнольд эса Дубайдан чиқиб кета олмаётган эди. Шу сабабли Ироқ томони FIFAга ўйинни бошқа муддатга кўчириш бўйича расмий сўров юборган. Бироқ FIFA аралашуви билан жамоанинг Мексикага етиб бориши учун барча шароитлар, жумладан, уларга хусусий самолёт берилган.

Маълумот учун, қитъалараро плей-офф босқичида охирги икки йўлланма учун олтита жамоа: Боливия, Конго ДР, Ироқ, Ямайка, Янги Каледония ва Суринам кураш олиб боради.

Ироқликлар 31 март куни Монтеррейда ҳал қилувчи баҳсни ўтказади. Уларнинг рақиби 26 март куни ўзаро куч синашадиган Боливия ва Суринам жуфтлиги ғолиби бўлади. Агар Ироқ ғалаба қозонса, 1986-йилдан бери илк бор Жаҳон чемпионатининг финал босқичига йўл олади.