Iroq terma jamoasi Jahon chempionati yo‘llanmasi uchun hal qiluvchi o‘yin o‘tkazish maqsadida Meksikaning Monterrey shahriga xususiy samolyotda yo‘l oladi. Bu haqda Al-Kora Exhibition  nashriga tayanib Ria Novosti xabar berdi.

Ma’lum qilinishicha, jamoa 20 mart, juma kuni Saudiya Arabistonining Arar shahridagi aeroportdan maxsus reys bilan Meksikaga uchib ketadi.

Eslatib o‘tamiz, Yaqin Sharqdagi qurolli mojarolar tufayli mintaqada havo hududlarining yopilishi Iroq jamoasi uchun katta muammolarni keltirib chiqardi. Jamoaning yarmi Bag‘dodda qolib ketgan, bosh murabbiy Grem Arnold esa Dubaydan chiqib keta olmayotgan edi. Shu sababli Iroq tomoni FIFAga o‘yinni boshqa muddatga ko‘chirish bo‘yicha rasmiy so‘rov yuborgan. Biroq FIFA aralashuvi bilan jamoaning Meksikaga yetib borishi uchun barcha sharoitlar, jumladan, ularga xususiy samolyot berilgan.

Ma’lumot uchun, qit’alararo pley-off bosqichida oxirgi ikki yo‘llanma uchun oltita jamoa: Boliviya, Kongo DR, Iroq, Yamayka, Yangi Kaledoniya va Surinam kurash olib boradi.

Iroqliklar 31 mart kuni Monterreyda hal qiluvchi bahsni o‘tkazadi. Ularning raqibi 26 mart kuni o‘zaro kuch sinashadigan Boliviya va Surinam juftligi g‘olibi bo‘ladi. Agar Iroq g‘alaba qozonsa, 1986-yildan beri ilk bor Jahon chempionatining final bosqichiga yo‘l oladi.