Германиянинг “Бавария” клуби Чемпионлар Лигасининг бўлажак чорак финал баҳси олдидан УЕФАга махсус сўров билан мурожаат қилди. Мюнхенликлар Мадриднинг “Реал” клубига жавоб ўйини пайтида “Сантяго Бернабеу” стадиони томини ёпишни тақиқлашни сўраган.
Хабарларга кўра, “Бавария” раҳбарияти ва мураббийлар штаби 2023/24-йилги мавсум ярим финалидаги воқеалар такрорланишидан хавотирда. Ўшанда стадион томи ёпилган ҳолда ўтган баҳсда трибунадаги акустика ва мухлисларнинг босими “ҳаддан ташқари душманона” ва оғир муҳитни юзага келтирган. Германия клуби айнан мана шу фактор ўйин натижасига салбий таъсир кўрсатади деб ҳисобламоқда.
Бироқ УЕФА “Бавария”нинг ушбу сўровини рад этди. Ташкилот расмийлари стадион томини ёпиш ёки очиш клубнинг ички иши эканлигини ва бу борада қатъий тақиқ қўйилмаслигини маълум қилган. УЕФАнинг ушбу жавоби Мюнхен клуби ичидаги хавотир ва тушкунликни янада оширгани айтилмоқда. Эндиликда “Бавария” нафақат Мадриднинг юлдузли таркибига, балки “Бернабеу”нинг ёпиқ гумбази остидаги мислсиз босимга ҳам тайёргарлик кўришига тўғри келади.
Маълумот учун, ҳозирча “Реал” ҳам, “Бавария” ҳам Чемпионлар Лигаси чорак финал йўлланмасига эга чиқмаган. Мюнхенликлар 1/8 финалнинг илк ўйинида “Аталанта”ни 6:1 ҳисобида мағлуб этган бўлса, “Реал” “Манчестер Сити”дан 3:0 ҳисобида устун келган. Агар жавоб учрашувларида кутилмаган мўъжизалар юз бермаса, “Реал” ва “Бавария” чорак финал босқичида ўзаро ўйнайди.













