«ПСЖ» ҳужумчиси Хвича Кварацхелия Чемпионлар лигаси 1/8 финали доирасида «Челси»га қарши кечган жавоб учрашувининг (3:0) энг яхши футболчиси деб топилди. 25 ёшли грузиялик футболчи ушбу баҳсда 73 дақиқа ҳаракат қилди ва битта гол муаллифига айланди.

«ПСЖ» чап қанотни Хвича учун очиқ қолдирди, у эса тўпни қабул қилиб, ҳар сафар ажойиб назорат намойиш этган ҳолда ҳужумга ўтди. Вингер ажойиб гол урди, тўпни ишончли бошқарди ва жамоадошларини ҳайратланарли узатмалар билан таъминлаб турди», — дея таъкидлади UEFA техник кузатувчилар гуруҳи.

Дастлабки ўйинда ҳам 5:2 ҳисобида ғалаба қозонган «ПСЖ» икки учрашув натижасига кўра чорак финалга йўл олди. У ерда парижликлар «Галатасарой» — «Ливерпуль» (биринчи ўйин — 1:0) жуфтлиги ғолиби билан тўқнаш келишади.