«Барселона»нинг ёш вингери Ламин Ямал 18 ёшидаёқ Чемпионлар лигасида «кўк-анорранглилар»нинг асосий таркибида Хосеп Гвардиолага қараганда кўпроқ ўйин ўтказишга улгурди. Opta Sports берган маълумотларга кўра, энди Ямал ҳисобида ЕЧЛ доирасида «Барса»нинг асосий таркибида бошлаган 28 та ўйин мавжуд, Гвардиолада эса бу кўрсаткич 27 тани ташкил этган эди.
Эслатиб ўтамиз, Ямал Чемпионлар лигаси 1/8 финалидан ўрин олган «Ньюкасл»га қарши жавоб ўйинини асосий таркибда бошлайди. Учрашув Каталония пойтахтида бўлиб ўтади ва чоршанба кунги ЕЧЛ ўйинларини очиб беради. Бир ҳафта олдин Ньюкасл-апон-Тайн шаҳрида ўтган дастлабки баҳсда жамоалар 1:1 ҳисобидаги дурангга имзо чекишган эди.













