Бирмингемнинг «Астон Вилла» клуби ҳимоячиси Пау Торрес туманли Альбионни тарк этиб, Испанияга кўчиб ўтиши мумкин. Бу ҳақда Estadio Deportivo портали журналистлари хабар бермоқда.
Манбага маълум бўлишича, футболчи Каталониянинг «Барселона» клуби қизиқишлари доирасида турибди. Бундан ташқари, «кўк-анорранглилар»нинг потенциал янги ўйинчилари рўйхатидан Дортмунднинг «Боруссия» клуби аъзоси Нико Шлоттербек ҳам жой олган.
«Барса» учун ушбу позициядаги устувор вариант Миланнинг «Интер» клуби ҳимоячиси Алессандро Бастони ҳисобланади. Бироқ каталонияликлар товон пулининг юқорилиги сабабли унинг трансферидан воз кечишлари мумкин.
Жорий мавсумда Торрес 26 та баҳсда майдонга тушди. Унинг бозор қиймати 22 миллион еврога баҳоланмоқда, шартномаси эса 2028 йилнинг ўрталаригача мўлжалланган.
