Манбага кўра, Бразилия футбол федерациясига яқин шахслар Неймарнинг жаҳон чемпионатида иштирок этиши масаласи анча ноаниқ ҳолатга келиб қолганини билдирмоқда. Бу ҳақда CNN Brazil хабар берди.

Қайд этилишича, федерация раҳбариятида «Сантос» ҳужумчиси узоқ вақт майдондан четда қолгани ва жисмоний ҳолати билан боғлиқ муаммолар туфайли керакли формани тиклай олишига ишонч йўқ.

Шунингдек, футболчи ва расмийлар ўртасида муносабатлар таранг экани айтилмоқда. Манба маълумотига кўра, Неймарнинг айрим оммавий баёнотлари ва медиа майдондаги чиқишлари федерация ичида салбий қабул қилинмоқда ва норозиликка сабаб бўлмоқда.

Алоҳида равишда «Мирассол»га қарши сўнгги ўйин билан боғлиқ ҳолат ҳам тилга олинган: Бразилия терма жамоаси бош мураббийи Карло Анчелотти футболчининг ҳолатини шахсан баҳолаш учун ўйинга келган, бироқ Неймар юкламани назорат қилиш сабаб майдонга тушмаган ва ҳатто стадионда ҳам бўлмаган. Бу ҳолат федерацияда салбий қабул қилинган.

Манбага кўра, айнан шу ҳолат муносабатлар ёмонлашувида ҳал қилувчи омил бўлган бўлиши мумкин. Ҳозирда федерация ичида Неймарнинг жаҳон чемпионатига бориш эҳтимоли жуда паст, деган фикр устунлик қилмоқда. Шу билан бирга, футболчида вазиятни ўзгартириш учун чекланган миқдорда ўйинлар қолгани таъкидланмоқда, аммо айни пайтда унинг турнирда иштирок этиши анча шубҳали кўринмоқда.