«Реал» бош мураббийи Альваро Арбелоа Ла Лига 29-тури доирасида «Атлетико»га қарши кечган баҳсдаги (3:2) Винисиуснинг ўйинига баҳо берди.

Бразилиялик футболчи иккинчи бўлимда дубль қайд этди, жумладан, 72-дақиқада ғалаба голини киритди.

«Винисиусдан яна бир ажойиб ўйин. Иқтидор, шижоат, характер ва қўрқувсизликнинг навбатдаги намойиши. У хато қилишдан қўрқмайди ва қайта-қайта ҳаракат қилишда давом этади.

У жуда қийин вазиятда бизга ғалаба келтирган ақл бовар қилмас гол урди. Таркибимизда ишга бўлган садоқати, истеъдоди ва жамоани ўз ортидан эргаштиришга бўлган доимий интилиши билан ажралиб турадиган бундай футболчи борлигидан бахтиёрмиз.

У фаолиятидаги энг яхши спорт формасидами ёки йўқми, билмадим, лекин у бунга жуда яқин турибди», – деди Альваро Арбелоа.