Мадриднинг «Атлетико» клуби ҳужумчиси Антуан Гризманн жамоани тарк этиши ҳақидаги хабарлардан сўнг мухлисларга мурожаат қилди. Футболчи 2026 йил ёзида АҚШнинг «Орландо Сити» клубига қўшилиши кутилмоқда.

«Ҳис-туйғуларимни сўз билан ифода этиш осон эмас, чунки бу клуб — менинг уйим, сизлар эса — оиламсизлар. Бу ерда унутилмас ўйинлар, голлар, қувонч ва эҳтиросларга тўла ажойиб саёҳат бўлди. Буни фақат “Атлетико”нинг бир қисми бўлиш нималигини ҳис қилганлар тушунади.

Аммо келажакни ҳозирча четга суриб қўяйлик, чунки мен ҳали кетмаяпман. Олдимизда яна бир неча ой бор — мен бу вақт ичида майдонда ҳам, сафар ўйинларида ҳам бор кучимни бераман, Испания Кубогини ютиш ва Чемпионлар лигасида иложи борича узоқроқ боришни орзу қиламан.

Бизда ҳали бахтли бўлиш учун имкониятлар кўп. Мен бу ерда ўтказадиган ҳар бир дақиқамни шу эмблемага бағишламоқчиман. Энг яхши кунлар ҳали олдинда. Биз буни ҳар доимгидек бирга амалга оширамиз. 2026 йил мавсуми охиригача менинг бугуним “қизил-оқ” бўлиб қолади ва юрагим ҳам доим шундай бўлади. Олға, “Атлетико”!», — деди Гризманн.