Мадриднинг «Атлетико» клуби ҳужумчиси Хулиан Альварес «Барселона»га ўтиш имкониятидан воз кечгани йўқ.

Аргентиналик футболчининг ўзи миш-мишларга жавоб берар экан, «матрасчилар»га содиқлигини таъкидламоқда, бироқ унинг Каталонияга кўчиб ўтиши ҳақидаги гап-сўзлар тинмаяпти. TEAMtalk нашрининг хабарига кўра, Альварес аллақачон «Атлетико» раҳбариятига трансфер учун тайёр эканлигини ва «Барселона» унинг учун асосий вариант эканлигини маълум қилган. Муаммо шундаки, «кўк-анорранглилар»да ушбу трансферни амалга ошириш учун зарур маблағ мавжуд эмас.

Хулиан Альвареснинг Transfermarkt сайтидаги баҳоси 90 млн еврони ташкил этади, аммо мавжуд маълумотларга кўра, «Барселона» футболчини ўзи учун анча қулайроқ шартларда сотиб олишга умид қилмоқда.