Анхель Ди Мария ижтимоий хавотирлар сабабли Аргентинага қайтишни истамаган эди — футболчи ўзи ва оиласи таъқиб ҳамда ҳужумлар нишонига айланишидан қўрққанди.
«Росарио Сентраль» мухлисларини ўз ўйини билан қувонтираётган футболчининг ўзига нисбатан ҳозирча бундай салбий ҳолатлар кузатилмади. Бироқ унинг турмуш ўртоғи ҳақида бундай деб бўлмайди — у мунтазам равишда ижтимоий тармоқларда ҳужумлар нишонига айланмоқда.
Яқинда Анхель ҳатто ватандошларидан бири билан онлайн даҳанаки жангга киришишга мажбур бўлди. Фойдаланувчи Ди Мария рафиқасига хиёнат қилаётгани ва шу сабабли аёлда доимий асабий бузилишлар бўлаётганига шаъма қилган пост қолдирган. «Реал»нинг собиқ юлдузи ибораларни танлаб ўтирмасдан, ғаразгўй кимсага у ҳақида нима деб ўйлашини очиқ-ойдин баён қилди.
