Anxel Di Mariya ijtimoiy xavotirlar sababli Argentinaga qaytishni istamagan edi — futbolchi o‘zi va oilasi ta’qib hamda hujumlar nishoniga aylanishidan qo‘rqqandi.

«Rosario Sentral» muxlislarini o‘z o‘yini bilan quvontirayotgan futbolchining o‘ziga nisbatan hozircha bunday salbiy holatlar kuzatilmadi. Biroq uning turmush o‘rtog‘i haqida bunday deb bo‘lmaydi — u muntazam ravishda ijtimoiy tarmoqlarda hujumlar nishoniga aylanmoqda.

Yaqinda Anxel hatto vatandoshlaridan biri bilan onlayn dahanaki jangga kirishishga majbur bo‘ldi. Foydalanuvchi Di Mariya rafiqasiga xiyonat qilayotgani va shu sababli ayolda doimiy asabiy buzilishlar bo‘layotganiga sha’ma qilgan post qoldirgan. «Real»ning sobiq yulduzi iboralarni tanlab o‘tirmasdan, g‘arazgo‘y kimsaga u haqida nima deb o‘ylashini ochiq-oydin bayon qildi.