Туркия терма жамоаси ЖЧ-2026 йўлланмаси учун кечган плей-офф баҳсида Руминия миллий жамоаси билан тўқнаш келди. Турклар ушбу учрашувда 1:0 ҳисобида минимал ғалабани қўлга киритишди.
Football-Italia нашри хабарига кўра, ярим ҳимоячи Хакан Чалханўғли мазкур ўйинда жароҳат олди. Олган жароҳати сабабли хавбек учрашувни охиригача етказа олмади ва сўнгги дақиқаларда захирага олинди.
Италия чемпионатининг жорий мавсумида 32 ёшли ярим ҳимоячи Миланнинг «Интер» клуби сафида 19 та ўйинда майдонга тушган. Хакан ўз ҳисобига 8 та гол ва 2 та голли узатмани ёздириб қўйишга муваффақ бўлган.
Ярим ҳимоячининг «нерадзуррилар» билан шартномаси 2027 йилнинг ўрталарига қадар мўлжалланган. Унинг бозор қиймати 18 миллион еврога баҳоланмоқда.
