«Страсбург» ҳужумчиси Хоакин Паничелли тиззасидаги хочсимон боғламлари узилгани сабабли узоқ муддатга сафдан чиқди. Журналист Аревало Мартин берган маълумотларга кўра, 23 ёшли футболчи ёзда бўлиб ўтадиган Жаҳон чемпионатида иштирок эта олмаслиги деярли аниқ бўлиб улгурган.
Хоакин Паничелли Аргентина терма жамоаси сафида ўтган йилнинг ноябрь ойида Анголага қарши кечган ўртоқлик учрашувида дебют қилган эди. Ҳужумчи жорий мавсумни кўтаринки руҳда ўтказмоқда: у 16 та гол билан Франция Лига 1 тўпурарлар пойгасида пешқадамлик қилмоқда. Умумий ҳисобда эса «Страсбург» либосида ушбу мавсумда 39 та ўйинда майдонга тушиб, 20 та гол муаллифига айланган.
Эслатиб ўтамиз, «альбиселесте» бўлажак мундиалнинг гуруҳ босқичида Жазоир, Австрия ва Иордания терма жамоалари билан куч синашади.
