Россия ва Мали терма жамоалари ўртасидаги ўртоқлик учрашувида Рустам Лутфуллин бошчилигидаги ўзбекистонлик ҳакамлар бригадаси ишлайди.

Учрашув 31 март куни Санкт-Петербург шаҳридаги “Газпром Арена” стадионида бўлиб ўтади. Баҳс Тошкент вақти билан соат 22:00 да бошланиши режалаштирилган. Рустам Лутфуллинга қанотларда Санжар Шоюсупов ва Акмал Ғиёсов кўмаклашади. Захира ҳаками — россиялик Алексей Сухой.

Маълумот учун, 34 ёшли Лутфуллин Ўзбекистон чемпионати ва кубоги ўйинларидан ташқари, халқаро майдонда ҳам фаолият юритади. У 2025-йилда 17 ёшгача бўлган футболчилар ўртасидаги Жаҳон чемпионати гуруҳ босқичида 3 та ўйинни бошқарган. Шунингдек, 2024-йилда ЖЧ саралаш босқичининг 4 та баҳсида ишлаган.

Эътиборлиси, Валерий Карпин бошчилигидаги Россия терма жамоасининг март ойидаги биринчи учрашувини (Никарагуага қарши, 3:1) ҳам ўзбекистонлик ҳакамлар — Абдурашид Худойберганов бошчилигидаги бригада бошқарган эди.