Нидерландия ва Эквадор терма жамоалари ўртасидаги ўртоқлик учрашуви якунланди. Финал ҳуштаги чалинганида ҳисоб 1:1 кўринишини олди. Учрашув Эйндховендаги «Филипс» стадионида бўлиб ўтди. Баҳсни германиялик бош ҳакам Саша Штегеманн бошқариб борди.

Ўйиннинг учинчи дақиқасида Вильям Пачо автогол муаллифига айланиб, нидерландларни ҳисобда олдинга олиб чиқди. 12-дақиқада Европа жамоаси вакили Дензел Думфрис қизил карточка олиб, майдонни тарк этди. 24-дақиқада Эннер Валенсия пенальтини аниқ амалга ошириб, мувозанатни тиклади.

Жаҳон чемпионати — 2026 турнирида Нидерландия терма жамоаси «F» гуруҳида Япония, Тунис ва яна бир (кейинроқ маълум бўладиган) жамоага қарши баҳс олиб боради. Эквадор эса гуруҳ босқичида Германия, Кюрасао ва Кот-д'Ивуар билан тўқнаш келади.

2026 йилги Жаҳон чемпионати ёзда учта мамлакат — АҚШ, Канада ва Мексика ҳудудида бўлиб ўтади. Айни дамда Аргентина терма жамоаси амалдаги Жаҳон чемпиони ҳисобланади.