Бразилия ва Хорватия терма жамоалари ўртасидаги ўртоқлик учрашуви якунланди. Ўйин АҚШнинг Орландо шаҳридаги «Орландо Ситрус Боул» стадионида бўлиб ўтди. Учрашувда бразилияликлар 3:1 ҳисобида ғалаба қозонди.

Биринчи бўлимга қўшиб берилган вақтда ҳимоячи Данило Винисиус Жуниорнинг узатмасидан фойдаланиб ҳисобни очди. 84-дақиқада хорватиялик ярим ҳимоячи Ловро Майер мувозанатни тиклади. Орадан тўрт дақиқа ўтиб, бразилиялик ҳужумчи Игор Тьяго пенальтидан аниқ зарба йўллаб, жамоасини яна олдинга олиб чиқди. 90+2-дақиқада эса Габриэл Мартинелли Эндрикнинг пасидан кейин якуний ҳисобни ўрнатди.

Аввалроқ ўтказилган ўртоқлик учрашувида Бразилия Францияга 1:2 ҳисобида мағлуб бўлганди, Хорватия эса Колумбияни 2:1 ҳисобида енгган эди.

Ўртоқлик ўйини
2026 йил 1 апрель, чоршанба. 05:00
Бразилия — Хорватия — 3:1
Голлар: Данило 45+2 (1:0), Майер 84 (1:1), Тьяго 88 (2:1), Мартинелли 90+2 (3:1)