«Реал Мадрид» ярим ҳимоячиси Эдуардо Камавинга жамоадоши Килиан Мбаппенинг Франция терма жамоаси учун қанчалик аҳамиятли экани ҳақида ўз фикрлари билан ўртоқлашди.

«Мбаппе сўнгги 7-8 йилдан бери Франция учун муҳим рол ўйнаб келмоқда. Бу ҳайратланарли. У жуда меҳнаткаш ва доимо жамоасига ёрдам беради. Илгари у "ПСЖ"да ўйнаган ва биз бир-биримизга қарши жуда кўп майдонга тушганмиз. Энди эса у биз билан бирга — ҳам Франция терма жамоасида, ҳам "Реал"да тўп сурмоқда, бу эса янада яхшироқ. У ақл бовар қилмас даражада иқтидорли», — деди Камавинга ESPN нашрига берган интервьюсида.

Килиан Мбаппе 2017 йилдан буён Франция терма жамоаси шарафини ҳимоя қилиб келмоқда. У «учранглилар» сафида 96 та ўйин ўтказиб, 56 та гол уришга муваффақ бўлган. Миллий жамоа таркибида ҳужумчи 2018 йилги Жаҳон чемпиони ва 2021 йилги Миллатлар лигаси ғолибига айланган.