Мадриднинг «Реал» клуби Франция терма жамоаси ҳужумчиларидан бирини ўз сафига қўшиб олишга қизиқиш билдирмоқда. Бу ҳақда Teamtalk нашри хабар бермоқда.
Журналистларнинг маълумотларига кўра, «қироллик клуби»нинг қизиқишлари доирасига Англия Премьер-лигасида «Ливерпуль» шарафини ҳимоя қилаётган ҳужумчи Уго Экитике тушган. «Қаймоқранглилар» футболчининг Бундеслигадан АПЛга ўтганидан кейинги фаолиятини диққат билан кузатиб боришмоқда.
23 ёшли футболчининг бозор қиймати 90 миллион еврони ташкил этади. Экитике ва «Ливерпуль» ўртасидаги амалдаги меҳнат шартномаси 2031 йилнинг июнь ойи охиригача мўлжалланган.
Англия чемпионатининг жорий мавсумида ҳужумчи 28 та ўйинда майдонга тушиб, ўз ҳисобига 11 та гол ва тўртта голли узатмани ёзиб қўйишга муваффақ бўлди.
