Франция терма жамоаси ва «Реал» ҳужумчиси Килиан Мбаппе Евро-2020 турнирининг 1/8 финалида Швейцарияга қарши ўйиндаги (3:3, пен. — 4:5) амалга оширилмаган пенальтидан сўнг нималарни бошдан кечирганини сўзлаб берди.

«Мен Франция терма жамоасидан кетмоқчи эдим. Мен учун Франция терма жамоаси устувор вазифалар рўйхатида жуда-жуда юқорида турарди, аммо пенальтида адашганим заҳоти кўпчилик мени "маймун" деб ҳақоратлай бошлади. Ўшанда ўзимга савол бердим: "Мен майдонда мана шу инсонлар учун курашяпманми?". Мен катта тушкунликка тушиб қолдим, чунки терма жамоадаги биринчи турнирим 2018 йилги Жаҳон чемпионати эди — мен унда ғолиб чиққандим ва жуда ёш бўлишимга қарамай, миллий қаҳрамонга айлангандим. Кейинги турнирда эса сени шунчаки лойга қориштиришди. Бу жуда оғир эди», — деди Мбаппе The Bridge YouTube-шоусида.

Шунингдек, у Франция футбол федерацияси президенти олдига бориб, бошқа терма жамоада ўйнашни истамаслигини очиқ айтганини қўшимча қилди. Бироқ жавобан: «Сен ҳақиқатан ҳам сени шундай кетишингга йўл қўяман деб ўйлайсанми?» — деган сўзларни эшитган.

Ҳозирда 27 ёшли Килиан Франция терма жамоаси сардори ҳисобланади. У миллий жамоа сафида 96 та ўйин ўтказиб, 56 та гол урди ва 40 та голли узатмани амалга оширди. Оливье Жирунинг терма жамоадаги голлар бўйича рекордини янгилаши учун унга атиги битта гол қолди.