Лондоннинг «Арсенал» клуби бош мураббийи Микель Артета март ойи якунларига кўра Англия Премьер-лигасининг энг яхши мураббийи деб топилди. Бу ҳақда ташкилот матбуот хизмати маълумот тарқатди.

«Арсенал» март ойида Англия чемпионати доирасида ўтказилган барча учта ўйинда ғалаба қозонди. Эслатиб ўтамиз, «канонирлар» ўз майдонида «Челси» (2:1) ва «Эвертон»ни (2:0) мағлуб этган бўлса, сафарда «Брайтон»дан (1:0) устун келди.

31-турдан сўнг «Арсенал» 70 очко жамғарган ҳолда Премьер-лига турнир жадвалида пешқадамлик қилмоқда. «Манчестер Сити» билан орадаги фарқ тўққиз очкони ташкил этади, бироқ «шаҳарликлар» ихтиёрида битта захира ўйини мавжуд.

4 апрель куни Артета шогирдлари Англия Кубоги чорак финали доирасида сафарда «Саутгемптон»га қарши майдонга тушишади. Ўйин Тошкент вақти билан соат 00:00 да бошланади.