Лондоннинг «Арсенал» клуби ҳужумчиси Габриэль Жезус одамларнинг клубга бўлган муносабати ҳақида фикр билдирди.
Бразилиялик футболчининг фикрича, сўнгги йилларда жамоатчилик «тўпчилар»ни очиқчасига ёқтирмай қолган.
«Бу ерда тўп сураётган вақтим давомида шуни сездимки, клубдан ташқаридаги жуда кўп одамлар "Арсенал"дан нафратланишади. Бу нима билан боғлиқлигини тушунмаяпман», — деди 29 ёшли форвард «Манчестер Юнайтед» афсонаси Рио Фердинандга берган интервьюсида.
Жорий мавсумда Микель Артета жамоаси ҳаддан ташқари прагматик ўйин услуби ва стандарт вазиятларга ҳаддан зиёд таяниб қолгани учун тез-тез танқидларга учрамоқда.
Габриэль Жезус 2022 йилнинг ёзида «Манчестер Сити»дан «Арсенал» сафига ўтган эди.
