Мадриднинг «Реал» клуби Англия Премьер-лигасидан яна бир марказий ҳимоячига харидор бўлмоқда.
«Қироллик клуби» Лондоннинг «Арсенал» жамоасидан Вильям Салибани ҳамда «Ливерпуль»дан Ибраима Конатени ўз сафига қўшиб олиш уринишларидан воз кечди. Transfer News Live нашрининг Defensa Central’га таяниб хабар беришича, «қаймоқранглилар»нинг янги нишони «Кристал Пэлас» шарафини ҳимоя қилаётган Максанс Лакруа бўлиб турибди. Аввалроқ франциялик футболчига «Бавария» ва «Ливерпуль» клублари ҳам қизиқиш билдираётгани айтилган эди.
Март ойида Лакруа Бразилияга қарши кечган баҳсда захирадан майдонга тушиб, Франция терма жамоасида дебют қилди. Transfermarkt экспертлари футболчининг бозор қийматини 40 млн еврога баҳоламоқда. 6 апрель куни марказий ҳимоячи 26 ёшни қарши олади.
