«Барселона» бош мураббийи Ханс-Дитер Флик Ла Лигада ҳали ҳеч нарса ҳал бўлмаган деб ҳисоблайди.

Шанба куни каталонияликлар сафарда «Атлетико»ни мағлуб этишди (2:1) ва Мадриднинг «Реал» клуби билан орадаги фарқни етти очкога етказишди. Аввалроқ, ўша куни «қаймоқранглилар» «Мальорка»га имкониятни бой беришган эди (1:2).

«Кийиниш хонасида йигитлар жуда хурсанд эдилар. Аммо олдинда бизни нима кутаётганини ҳамма билади. Ҳали ҳеч нарса ҳал бўлгани йўқ. Биз хурсандмиз, лекин байрам қилишга ҳали эрта», – деди Флик ғалабадан кейинги матбуот анжуманида.

Чоршанба куни, 8 апрельда, «Барселона» Чемпионлар лигаси чорак финалининг илк баҳсида яна ўша «Атлетико» билан тўқнаш келади. Испания чемпионатининг навбатдаги турида эса «кўк-анорранглилар» ўз майдонида «Эспаньол»ни қабул қилади.