«Barselona» bosh murabbiyi Xans-Diter Flik La Ligada hali hech narsa hal bo‘lmagan deb hisoblaydi.
Shanba kuni kataloniyaliklar safarda «Atletiko»ni mag‘lub etishdi (2:1) va Madridning «Real» klubi bilan oradagi farqni yetti ochkoga yetkazishdi. Avvalroq, o‘sha kuni «qaymoqranglilar» «Malyorka»ga imkoniyatni boy berishgan edi (1:2).
«Kiyinish xonasida yigitlar juda xursand edilar. Ammo oldinda bizni nima kutayotganini hamma biladi. Hali hech narsa hal bo‘lgani yo‘q. Biz xursandmiz, lekin bayram qilishga hali erta», – dedi Flik g‘alabadan keyingi matbuot anjumanida.
Chorshanba kuni, 8 aprelda, «Barselona» Chempionlar ligasi chorak finalining ilk bahsida yana o‘sha «Atletiko» bilan to‘qnash keladi. Ispaniya chempionatining navbatdagi turida esa «ko‘k-anorranglilar» o‘z maydonida «Espanyol»ni qabul qiladi.
