«Барселона» устози Ханс-Дитер Флик Чемпионлар лигаси доирасида Мадриднинг «Атлетико» жамоасига қарши бўлиб ўтадиган тўқнашувдан нималар кутаётгани ҳақида гапириб берди.

Шанба куни каталонияликлар Ла Лига доирасида «матрасчилар»ни мағлуб этишган эди (2:1). Келаётган чоршанба куни эса «Камп Ноу» стадионида жамоалар ўртасидаги Чемпионлар лигаси чорак финалининг дастлабки баҳси бўлиб ўтади.

«Чемпионлар лигасида ҳаммаси бошқача бўлади — ҳар бир иштирокчи яна 10 фоиз кўпроқ куч билан ҳаракат қилади. Иккала жамоа ҳам ярим финалга чиқишни истайди. Биз айнан мана шундай ўйинлар учун тайёргарлик кўрамиз. Биз ўз ўйинимизни намойиш этишимиз керак», — деди Флик ўз интервьюсида.

Жавоб учрашуви 14 апрель куни бўлиб ўтади. Ушбу қарама-қаршилик ғолиби ярим финалда Лондоннинг «Арсенал» ёки Лиссабоннинг «Спортинг» жамоаларидан бири билан тўқнаш келади.