«Barselona» ustozi Xans-Diter Flik Chempionlar ligasi doirasida Madridning «Atletiko» jamoasiga qarshi bo‘lib o‘tadigan to‘qnashuvdan nimalar kutayotgani haqida gapirib berdi.
Shanba kuni kataloniyaliklar La Liga doirasida «matraschilar»ni mag‘lub etishgan edi (2:1). Kelayotgan chorshanba kuni esa «Kamp Nou» stadionida jamoalar o‘rtasidagi Chempionlar ligasi chorak finalining dastlabki bahsi bo‘lib o‘tadi.
«Chempionlar ligasida hammasi boshqacha bo‘ladi — har bir ishtirokchi yana 10 foiz ko‘proq kuch bilan harakat qiladi. Ikkala jamoa ham yarim finalga chiqishni istaydi. Biz aynan mana shunday o‘yinlar uchun tayyorgarlik ko‘ramiz. Biz o‘z o‘yinimizni namoyish etishimiz kerak», — dedi Flik o‘z intervyusida.
Javob uchrashuvi 14 aprel kuni bo‘lib o‘tadi. Ushbu qarama-qarshilik g‘olibi yarim finalda Londonning «Arsenal» yoki Lissabonning «Sporting» jamoalaridan biri bilan to‘qnash keladi.
