«Атлетико» ва «Манчестер Юнайтед» клублари собиқ ҳужумчиси Диего Форлан Англия ва Испания чемпионатларининг ўзига хос жиҳатлари ҳақида гапириб берди.

«Фарқ жуда аниқ — Премьер-лига мутлақо бошқа даражада. Мен иккала лигада ҳам ўйнаганман, шунинг учун нима ҳақида гапираётганимни биламан. Ла Лигада битта ҳимоячини алдаб ўтсангиз, кейингиси орқага чекинади, сизга бўш жой беради ва ўйнашингизга қўйиб беради. У ерда ўйлашга ва маҳоратингизни кўрсатишга вақт бор.

Премьер-лигада эса вақт йўқ. Бир ҳимоячини алдаб ўтдингизми, иккинчиси аллақачон сизни таъқиб қилаётган бўлади. Ҳар сонияда доимий босим, шиддат ва жисмоний кураш. Айнан шу сабабли баъзи футболчиларга Ла Лигани тарк этиш қийин кечади.

Мисол учун, Анхель Ди Марияни олсак — Испанияда у жаҳон даражасидаги юлдуз эди, аммо «Манчестер Юнайтед»да ишлари юришмади. Бу борада баҳслашиш мумкин, лекин токи Премьер-лигада ўйнаб кўрмас экансиз, тўлақонли футболчи бўлиш нима эканлигини охиригача тушунмайсиз», — деди Форлан.