"Челси" ёзги трансфер ойнаси вақтида янги дарвозабон билан шартнома имзоламоқчи. Football Insider нашри манбаларига кўра, Лондон клубининг мақсадлар рўйхатидан Нидерландия терма жамоасининг истеъдодли посбони жой олган.
Қайд этилишича, "кўклар" раҳбарияти асосий дарвозабон Роберт Санчесга ўринбосар қидирмоқда, шу сабабли улар "Сандерленд" посбони Робин Руфсга қизиқиш билдиришган. Унинг трансфер қиймати камида 60 миллион фунт стерлингга баҳоланмоқда.
23 ёшли Руфснинг ҳаракатларини, шунингдек, "Ливерпуль" ва "Манчестер Сити" каби клублар ҳам диққат билан кузатиб бормоқда.
Таъкидлаш жоизки, Робин Руфс ўтган ёзда "Неймеген"дан 10 миллион евро эвазига "Сандерленд"га келиб қўшилган эди. Ушбу мавсумда у клуб сафида барча мусобақаларда 30 та ўйинда майдонга тушиб, шулардан 9 тасида ўз дарвозаси дахлсизлигини сақлаб қолди.
