"Chelsi" yozgi transfer oynasi vaqtida yangi darvozabon bilan shartnoma imzolamoqchi. Football Insider nashri manbalariga ko‘ra, London klubining maqsadlar ro‘yxatidan Niderlandiya terma jamoasining iste’dodli posboni joy olgan.

Qayd etilishicha, "ko‘klar" rahbariyati asosiy darvozabon Robert Sanchesga o‘rinbosar qidirmoqda, shu sababli ular "Sanderlend" posboni Robin Rufsga qiziqish bildirishgan. Uning transfer qiymati kamida 60 million funt sterlingga baholanmoqda.

23 yoshli Rufsning harakatlarini, shuningdek, "Liverpul" va "Manchester Siti" kabi klublar ham diqqat bilan kuzatib bormoqda.

Ta’kidlash joizki, Robin Rufs o‘tgan yozda "Neymegen"dan 10 million yevro evaziga "Sanderlend"ga kelib qo‘shilgan edi. Ushbu mavsumda u klub safida barcha musobaqalarda 30 ta o‘yinda maydonga tushib, shulardan 9 tasida o‘z darvozasi daxlsizligini saqlab qoldi.