«Штутгарт» клуби ўз сафида ҳужумчи Дениз Ундавни сақлаб қолишга ҳаракат қилмоқда. Март ойида 29 ёшли Ундав Бундеслиганинг энг яхши футболчиси совринини қўлга киритган эди.

Ҳозирда Ундавнинг шартномаси бўйича музокаралар дастлабки босқичда турибди. Sky Germany нашрининг хабар беришича, футболчининг вакиллари ўз мижозининг маошини 6 миллион еврогача оширишни талаб қилишмоқда.

«Штутгарт» тарихида бирор бир ўйинчи ҳали бунчалик катта маош олмаган. Айни дамда терма жамоа аъзоси ҳисобланган Ундав тахминан 4,5 миллион евро маош олмоқда. Унинг амалдаги шартномаси 2027 йилда ўз ниҳоясига етади.

Жорий мавсумда Ундав клуб миқёсидаги 39 та ўйинда 23 та гол урди ва 13 та голли узатмани амалга оширди. Transfermarkt портали талқинига кўра, унинг бозор қиймати 22 миллион еврони ташкил қилади.