Англия Премьер Лигаси (АПЛ) 2026/27-йилги мавсум учун Чемпионлар Лигасида қўшимча йўлланмани муддатидан олдин кафолатлади. Эндиликда Англия чемпионатида кучли бешликдан жой олган барча жамоалар тўғридан-тўғри қитъанинг энг нуфузли турнири асосий босқичига йўл олади.

Лондоннинг “Арсенал” клуби ЕЧЛ чорак финалининг дастлабки учрашувида Португалиянинг “Спортинг” жамоаси устидан ғалаба қозониши (1:0) бу масалада ҳал қилувчи аҳамиятга эга бўлди. Ушбу натижа туфайли Англия УЕФА коэффициентлар жадвалида жорий мавсум якунига кўра кучли иккиликдан жой олиши аниқ бўлди.

УЕФА регламентига кўра, бир мавсум давомида энг яхши коэффициент тўплаган икки мамлакатга Чемпионлар Лигасининг янгиланган форматида қўшимча квоталар тақдим этилади.

УЕФА коэффициентлар жадвали (Жорий ҳолат):

Англия — 225.125 очко (Ҳозирда еврокубоклардаги қатнашаётган жамоалар сони: 5). Мавсумий коэффициент: 25.013

Испания — 162.250 очко (Ҳозирда еврокубоклардаги қатнашаётган жамоалар сони: 6). Мавсумий коэффициент: 20.281

Германия — 138.000 очко (Ҳозирда еврокубоклардаги қатнашаётган жамоалар сони: 3). Мавсумий коэффициент: 19.714

Португалия — 94.500 очко (Ҳозирда еврокубоклардаги қатнашаётган жамоалар сони: 3). Мавсумий коэффициент: 18.900

Италия — 131.000 очко (Ҳозирда еврокубоклардаги қатнашаётган жамоалар сони: 2). Мавсумий коэффициент: 18.714

Маълумот учун, айни пайтда Англия Премьер Лигаси турнир жадвалида “Арсенал” етакчилик қилмоқда. Пеп Гвардиола бошчилигидаги “Манчестер Сити” иккинчи поғонани банд этган бўлса, “Манчестер Юнайтед” кучли учликни якунлаб турибди. Кейинги ўринлардан “Астон Вилла” ҳамда “Ливерпуль” жой олган.