Чемпионлар лигасининг 1/4 финал дастлабки учрашувлари якунланди. Opta суперкомпьютери ҳисоб-китобларига кўра, сафарда Лиссабоннинг "Спортинг" жамоасини мағлуб этган (1:0) Лондоннинг "Арсенал" клуби турнир фаворити бўлиб қолмоқда. "Тўпчилар"нинг якуний зафар қучиш эҳтимоли 36,69% га баҳоланмоқда. Ғалаба учун иккинчи асосий даъвогар сифатида Мадридда "Реал"дан устун келган (2:1) "Бавария" эътироф этилмоқда — 29,11%. Даъвогарлар учлигини "Ливерпуль" билан жавоб ўйини олдидан иккита тўп фарқи билан устунлик яратган "ПСЖ" (16,22%) якунлаб берган. "Барселона" устидан қозонилган ғалабадан сўнг "Атлетико" тўртинчи фаворитга айланди, бироқ Диего Симеоне жамоасининг имкониятлари барибир паст баҳоланмоқда — 6,77%.

"Кўк-анорранглилар" 5,21% билан рейтингда бешинчи ўринда бормоқда, кейинги поғоналардан "Реал" (2,67%), "Ливерпуль" (1,83%) ва Лиссабоннинг "Спортинг" (1,50%) клублари жой олган.

Жавоб учрашувлари 14 ва 15 апрель кунлари бўлиб ўтади.