Стадион сухандонлиги масъулиятли касб ҳисобланади. Лига республиканинг турли ҳудудларида бир неча йиллардан буён фидойилик билан фаолият олиб бораётган сухандонларимиз меҳнатини қадрлайди.
Лига ўз мусобақалари учун инфотейнмент дастурига эга бўлиб, унда белгилаб берилган нормаларга қатъий риоя қилишни талаб қилади. Комиссарлар бир неча бор огоҳлантирганига қарамай, хусусан, «Бобур арена», «Қўқон марказий» стадионларида фаолият олиб бораётган устоз сухандонлар инфотейнмент қоидаларига риоя қилмаётган ҳолатлар учраб турибди. Бу каби ҳолатлар эса табиий равишда стадионга ташриф буюраётган футбол мухлисларининг ҳақли эътирозларига сабаб бўлади.
Суперлига регламентининг 14.15-бандида учрашув давомида овоз кучайтиргич орқали эълон қилинадиган ҳар қандай хабар ёки сигнал Комиссар билан келишилган бўлиши белгилаб қўйилган. Афсуски, шундай банд бўлишига қарамай, мезбон футбол клублари бу масалага ёндашишда сусткашликка йўл қўяётган ҳолатлар мавжуд. Бугунга келиб ҳар қандай учрашув натижаси ёки унинг атрофида рўй бераётган ахборотни қабул қилиш имкониятлари кенг. Шундай экан, айни учрашув билан боғлиқ бўлмаган, қўшимчасига, Комиссар билан келишилмай туриб, мезбон клуб мухлисларини тўлқинлантириш эвазига, стадионга ташриф буюраётган рақиб жамоа ишқибозларини асабийлашишга мажбур қиладиган эълонлар мусобақа регламентига зид ҳисобланади.
Келажакда бу каби ҳолатлар такрорланса, мезбон клубга нисбатан жарима интизом чораси қўлланилади.
