«Манчестер Юнайтед» собиқ посбони Давид де Хеа жамоанинг Майкл Кэррик қўл остидаги муваффақиятлари ҳақида фикр билдирди.
Англиялик мутахассис январь ойида Рубен Аморимнинг ўрнини эгаллаб, «қизил иблислар» бошқарувига келган эди. 44 ёшли мутахассис қўл остидаги ўнта ўйинда манкунианликлар еттита ғалабага эришдилар, икки бор дуранг ўйнаб, фақат бир марта мағлубиятга учрадилар.
«Кэррик ақл бовар қилмайдиган ишни амалга оширмоқда. «Манчестер Юнайтед» кўплаб ўйинларда ғалаба қозоняпти, ажойиб ўйин кўрсатмоқда. Умид қиламанки, Майкл клубда қолади ва уни яна чўққига қайтаради», — дея ҳозирда Италиянинг «Фиорентина» клубида тўп сураётган де Хеанинг сўзларини келтиради Англия ОАВлари.
Майкл Кэррикнинг «МЮ» билан шартномаси мавсум якунига қадар мўлжалланган.
