«Манчестер Сити»нинг норвегиялик тўпурари Эрлинг Холанд фаолиятини «Барселона»да давом эттиришни қатъий мақсад қилган. Бу ҳақда Topskills Sports UK нашри хабар тарқатди.
Манба берган маълумотларга кўра, Холанд келгусида «Барселона» шарафини ҳимоя қилишни истамоқда ва шу сабабли ёзда тушадиган бошқа барча таклифларни рад этиш ниятида. Ҳужумчи «кўк-анорранглилар» ҳозирча унинг трансферини молиявий жиҳатдан амалга ошира олмаслигини яхши тушунади, шу боис «орзусидаги трансфер» 2027 йилга режалаштирилган. Қайд этилишича, яқин вақт ичида ушбу эҳтимолий келишув борасида янги тафсилотлар пайдо бўлади.
Жорий мавсумда 25 ёшли Холанд барча турнирларда 44 та ўйинда майдонга тушиб, 33 та гол урди ва 7 та голли узатмани амалга оширди.
Норвегиялик футболчининг «Манчестер Сити» билан амалдаги шартномаси 2034 йилгача мўлжалланган. Transfermarkt мутахассислари ҳужумчининг бозор қийматини 200 миллион еврога баҳолашмоқда.
