«Манчестер Сити» клуби «Спортинг»нинг таянч ярим ҳимоячиси ва сардори Мортен Юльманнга қизиқиш билдирмоқда. Бу ҳақда A Bola нашри хабар бермоқда.

Манба берган маълумотларга кўра, ҳозирда томонлар ўртасида тўғридан-тўғри музокаралар олиб борилаётгани йўқ, бироқ «шаҳарликлар» «Спортинг» томонидан футболчининг трансфери бўйича қўйилган айрим шартлардан хабардор. Футболчининг шартномасида 80 млн евро миқдорида товон пули белгиланган бўлса-да, Португалия жамоаси раҳбарияти 40-50 млн евро атрофидаги сумма бўйича музокаралар ўтказишга тайёр.

Жорий мавсумда Юльманн барча мусобақаларда 39 та ўйинда иштирок этиб, 2 та гол ва 6 та голли узатмани амалга оширди. Футболчининг клуб билан амалдаги шартномаси 2028 йил ёзигача мўлжалланган. Transfermarkt портали маълумотларига кўра, унинг бозор қиймати 45 млн еврони ташкил этади.