Чоршанба куни Мадриднинг «Реал» клуби Чемпионлар лигаси 1/4 финали доирасида «Бавария»га қарши жавоб учрашувини ўтказади.

Альваро Арбелоа шогирдлари ўз уйларида кечган дастлабки баҳсда имкониятни бой беришган (1:2). Ярим финал йўлланмаси тақдири энди Мюнхендаги майдонда ҳал бўлади.

«Одамлар бизнинг камбэк қилишимизга ишонишмаяптими? Бу мени ташвишга солмайди. Бунга бизнинг 25 нафар футболчимиз ишониши керак — ва уларнинг барчаси биз вазиятни ўнглай олишимизга чин дилдан ишонишмоқда», — дея «қаймоқранглилар» бош мураббийининг сўзларини келтирмоқда Madrid Zone.

Ушбу қарама-қаршилик ғолиби финал йўлланмаси учун «ПСЖ» ёки «Ливерпуль» (биринчи ўйин — 2:0) жамоаларидан бирига қарши баҳс олиб боради.

Жума куни «Реал» Ла Лига доирасида ўз майдонида «Жирона»ни мағлуб эта олмаган эди (1:1).