Мадриднинг "Реал Мадрид" клуби Испания Қироллик футбол федерацияси — RFEF томонидан таклиф этилган ҳакамлик тизимини ислоҳ қилиш лойиҳасида иштирок этишдан бош тортди. «Қироллик клуби» бош директори Хосе Анхель Санчес ташкилотга бу борадаги учрашувларда эндиликда қатнашмаслигини маълум қилган. Бу ҳақда AS хабар бермоқда.
Манбага кўра, «Реал»да Ла Лига ҳакамлик нуқтаи назаридан адолатли мусобақа эмас, деган фикр шаклланган. Бу позиция жамоанинг 31-тур доирасидаги "Жирона"га қарши (1:1) ўйинидан кейин янада мустаҳкамланган. Ўша баҳсда Килиан Мбаппега нисбатан қоидабузарлик учун пенальти белгиланмагани клубда норозилик уйғотган. «Реал»да бу хатонинг нега тузатилмаганини тушунишмаяпти.
Ҳозирги пайтда Испания гранди ва RFEF ўртасида «ўта совуқлик» ҳукм сураётгани айтилмоқда. «Реал» федерация билан муносабатларни тиклаш ниятида эмас.













