Италиянинг «Милан» клуби «Удинезе»га қарши ўйинда ўз дарвозасидан учта тўп олиб чиқиб, қақшатқич мағлубиятга учради. Клубнинг собиқ ҳимоячиси Алессандро Костакурта муваффақиятсиз натижа сабаблари ва ўйин тафсилотларига тўхталиб ўтди.

«Жуда кўп қарши ҳужумларни ўтказиб юборишди. Бу ўйин вазиятларини тўғри баҳолашда муаммолар борлигини англатади, чунки қарши ҳужумларни доим олдиндан сезиш мумкин. Қачонки жамоа жипслашган ва компакт ҳолатда ўйнаса, унга қарши ҳужумлар хавф туғдира олмайди. Мен «Милан»да буни кўрмадим. Улар ҳужум қилишга уринишди, аммо бу ҳаракатлар унчалик қизиқарли чиқмади», — дея Костакуртанинг сўзларини келтирмоқда pianetamilan.it.

Навбатдаги турда «Милан» «Верона»га қарши майдонга тушади. Ҳозирда клуб А Серия турнир жадвалида учинчи ўринни эгаллаб турибди.