Мадриднинг «Реал» клуби жума куни «Жирона»га қарши кечган баҳсда (1:1) ҳакамнинг пенальти белгиламаслик ҳақидаги қароридан норози бўлди.

Ўйиннинг иккинчи бўлимида ҳужумчи Килиан Мбаппе жарима майдончаси ичида юзига зарба қабул қилиб олди ва майдонга йиқилди. Франциялик футболчининг юзи қонга белангани сабабли унга тиббий ёрдам кўрсатилишига тўғри келди. Бироқ, қоидабузарликни текширган VAR ҳакамлари бу ҳолатни пайқамай қолишган, деб хабар бермоқда Madrid Xtra нашри El Chiringuitoга таяниб. Ҳакамлар Мбаппенинг қонга беланган ҳолати акс этган суратларни фақат ўйиндан сўнг, ижтимоий тармоқлар орқали кўришган.

«Қаймоқранглилар» 11 метрлик жарима зарбаси берилмаганидан қаттиқ ғазабда. Бир кун ўтиб «Барселона» «Эспаньол»ни мағлуб этди ва «Реал» билан орадаги фарқни 9 очкога етказиб, турнир жадвалидаги пешқадамлигини мустаҳкамлаб олди.