Madridning «Real» klubi juma kuni «Jirona»ga qarshi kechgan bahsda (1:1) hakamning penalti belgilamaslik haqidagi qaroridan norozi bo‘ldi.
O‘yinning ikkinchi bo‘limida hujumchi Kilian Mbappe jarima maydonchasi ichida yuziga zarba qabul qilib oldi va maydonga yiqildi. Fransiyalik futbolchining yuzi qonga belangani sababli unga tibbiy yordam ko‘rsatilishiga to‘g‘ri keldi. Biroq, qoidabuzarlikni tekshirgan VAR hakamlari bu holatni payqamay qolishgan, deb xabar bermoqda Madrid Xtra nashri El Chiringuitoga tayanib. Hakamlar Mbappening qonga belangan holati aks etgan suratlarni faqat o‘yindan so‘ng, ijtimoiy tarmoqlar orqali ko‘rishgan.
«Qaymoqranglilar» 11 metrlik jarima zarbasi berilmaganidan qattiq g‘azabda. Bir kun o‘tib «Barselona» «Espanyol»ni mag‘lub etdi va «Real» bilan oradagi farqni 9 ochkoga yetkazib, turnir jadvalidagi peshqadamligini mustahkamlab oldi.
